新民黨集思會 論區選形勢

【明報專訊】區議會選舉今年底舉行，新民黨過去兩日就喺屯門黃金海岸酒店舉行集思會，據聞主要都係討論區選情况，共約50人出席，互相交流吓地區工作同選情分析等。新民黨副主席田北辰話，席間不論現任區議員定有意參選者，都要詳細交代對該區嘅認識、要幾多票先贏、有乜嘢挑戰等細節，等大家掌握邊啲參選人勝算大、邊個就危危乎呀咁。


會落力做選民登記

田二少唔肯透露該黨會派幾多人參選區議會，但佢就話參選嘅主要集中喺新界東、西同港島，除咗競逐連任外，佢哋打嘅區多數都係新劃選區，亦有同泛民對撼，甚至「獨立」嘅隱形建制都有。


雖然新民黨同公民力量合併，但似乎仲未搵到人參選明年立法會選舉新東嘅議席，田二少話佢哋都傾向搵喺今年區選受過直選洗禮嘅人，認為咁先可以服眾。


各個政黨都講選民登記，新民黨未來亦會落力做選民登記，田二少話，泛民不斷拉布，加上佔領運動，相信今年係一個好大契機吸引市民登記做選民，表達對泛民不滿，佢相信選民登記係爭取選民支持嘅有效方法，話「派1000張單張都未必咁有用」。