CY訪校 學生質問冇誠信

【明報專訊】特首梁振英（CY）又再靜靜落區，但去到邊都始終避唔過尖銳提問。話說噚日保良局蔡繼有學校舉行校際辯論比賽決賽，大會之前一直指會有一名政府官員出席分享，但冇講邊個，最後原來係梁振英。學生亦唔放過機會，問佢喺《施政報告》點名批評港大學生會刊物《學苑》，係咪打壓言論自由，當有學生話特首畀人冇誠信、冇承擔嘅形象時，全場即刻拍手。


任辯論賽嘉賓 被問《學苑》風波

有在場嘅人畀咗段錄音Emily，入面聽到一名讀緊中六嘅張同學話大學係學術自由嘅地方，而學術係無分對錯，「作為政府係咪應該保持中立，而唔係喺施政報告點名批評學術文章呢？」，「加上行政長官你本身給予人哋冇誠信、冇承擔嘅形象時，人無信而不立，你咁樣做係咪有打壓言論自由之嫌呢？」當張同學講到梁振英冇誠信、冇承擔一刻，錄音傳來鼓掌同歡呼聲。


梁振英之後就答話，作為特區首長係有需要指出社會上有呢啲錯誤嘅主張，「學術方面我哋可以研究呢樣嗰樣嘅問題，但任何一個地方嘅政府都係需要維持所屬國家嘅主權同領土完整，呢個係作為地方首長嘅職責，同言論自由、學術自由無關」。


保良局發言人話，特首都係早兩日先確認會出席，所以嚟唔切同學校公布。