老石獅「出山」 幫匯豐轉風水

【明報專訊】獅子銀行匯豐近年頭頭碰着黑，喺外國不停畀人話洗黑錢要罰款，喺香港又成日要炒人，管理層眼見兩隻獅子似乎鎮唔住香港嘅戾氣，決定喺曾經被佔領過嘅總行廣場嘅南邊，擺多兩隻石獅子。


收埋總行內逾30年

新獅子同舊獅子嘅風格完全唔同，新獅子得個獅頭，唔似舊獅子張牙舞爪。匯控行政總裁歐智華就形容佢地係returning friends，皆因呢兩隻新獅子其實唔新，喺1935年至1981年期間，一直擺放喺匯豐第三代總行嘅頂部，俯視香江，直至1981年搬入現有總行，就被收埋咗，而家再拎出嚟，話係恭迎市民到訪喎。


其他銀行為應付金管局資本要求，紛紛開源節流，渣打要裁走成個投行部門，連中銀香港都有傳要賣南洋商業銀行，匯豐擺多兩隻獅子吸引多啲「水源」就得。不過小琴衷心希望，呢兩隻獅子真係可以幫手改運，等匯豐唔使再喺香港炒人啦。


email: piano@mingpao.com

[小琴密語]