迪士尼酒店新春預訂近爆

【明報專訊】下月中就係羊年，迪士尼樂園噚日舉行傳媒聚餐，樂園度假區市務總監薛玉卿同著咗新年裝嘅米奇、米妮、唐老鴨影相，佢話樂園下月12號開始有花卉佈置，對今年新春入場人次樂觀，相信唔少市民同旅客都會入園賀年，新春期間兩間迪士尼酒店嘅預訂率已超過九成。


Emily知道一眾迪士尼卡通人物喺新春會換上以春日繁花為題嘅新年裝，同大家拜年；而喺火箭餐廳、安仔玩具箱等地方更增設「神奇光影畫藝」亮點，市民攞起「米奇光畫筆」就有奇妙嘅動畫效果。


情人節自助晚餐 每位558元

今年農曆新年前幾日係情人節，樂園推出咗情人節套餐，自助晚餐成人每位558元，聽日或之前預訂華特餐廳嘅套餐有八五折，兩位1444元；中餐廳晶荷軒嘅情人節套餐菜式就以「緣定三生」、「兩情相悅」等命名，兩位共1036元。