孫宏斌暗示買佳兆業？

【明報專訊】近排白武士成為熱門話題，呢次唔係講亞視，係講佳兆業（1638）。不過，大熱門融創（1918）老闆孫宏斌，噚日唔小心喺微博Share佢參與咗新浪網個「誰人最有機會接手佳兆業」投票個Status出嚟，仲顯示埋佢投咗「融創」，咁係咪叫表咗態？


微博投票「表態」 轉頭刪帖

雖然孫總好快就刪咗個微博，但小琴睇番個投票活動，去到噚晚有成322個人投咗票，唔知係咪多得孫總宣傳，融創仲係佳兆業白武士第一位，不過第二位就係佳兆業畀債主們「分屍」。查實孫總舊年收購綠城（3900），臨尾畀宋衛平「起尾注」，今次又捲土重來出手買佳兆業，睇嚟仲係好想搵嘢買。


其實融創一直做高端項目，佳兆業項目就以舊房改造為主，發展方向似乎有點風馬牛不相及。不過就算係真，孫宏斌嘅微博顯然不符合港交所嘅披露原則，真性情嘅孫總下次要低調點啦。


[小琴密語]