陳婉嫻爆seed 轟張建宗癲咗

【明報專訊】噚日立法會大會有火爆戲碼上演，工聯會議員陳婉嫻怒轟勞工及福利局長張建宗，鬧佢處理亞視欠薪問題不力，質問局長有無做到執法者本分，抑或拖拖拉拉發告票。當局長答佢「告票已經係刑事」嘅時候，嫻姐更加忍唔住「爆seed」，大鬧局長係癲咗，應該同時清亞視盤，搞到主席曾鈺成都要出嚟幫局長擋。


議員斥商經局「放生」亞視

噚日民主黨單仲偕針對亞視欠薪同無錢交牌費，口頭質詢商經局同勞福局，席間唔少議員鬧商經局「放生」亞視，臨尾由嫻姐出動，直斥亞視由去年11月欠薪到家係「鐵一般事實」，但政府仲「拖拖拉拉發咩告票」。不過張局長似乎覺得委屈，拿拿聲話告票已經係刑事，仲提醒聽日就係聆訊，如果罪成，董事最高刑罰係入獄3年。


不過，曾鈺成唔太樂見嫻姐同局長火併，仲同嫻姐講如果認為局長係癲嘅，可以喺其他場合再跟進喎。