陳弘毅：港大法律學院 優質研究比中大多

【明報專訊】大學教育資助委員會噚日公布八大院校研究水平報告前夕，《文匯報》率先披露港大法律學院輸畀中大法律學院，仲質疑「禍因」係港大法律學院前院長陳文敏掛住搞政治。噚日Emily喺港鐵撞到港大法律學院教授陳弘毅（圖），雖然佢同陳文敏政見不同，但都幫陳文敏講好話。


話陳文敏做研究唔少

陳弘毅話港大法律學院學者比中大多，唔可以確保所有研究都好高水平，但以數量計，港大法律學院嘅優質研究都係比中大多。佢仲話，港大法律學院有啲已簽長約嘅教授，唔使爭續約，可以做到退休，所以冇咁大動力做研究。咁陳文敏同戴耀廷表現點呢？陳弘毅話﹕「佢哋做嘅研究唔會比其他教授少。」


教資會嘅報告提早泄漏出嚟，教資會主席鄭維新噚日話，呢份報告以最高保密程度處理，20個委員傳閱過後都冇得攞走；換言之，教資會內得佢同秘書長安禮治有一份喺手。記者會上鄭維新兩度被問及係咪一早畀咗份報告教育局同行政會議，佢就當聽唔到無回應。