一句「攜手合作」 民建聯fb激嬲民主黨

【明報專訊】民建聯蔣麗芸（Ann姐）日前喺《蔣麗芸會客室》節目中訪問民主黨劉慧卿（卿姐），二人喺訪問中有講有笑，估唔到事隔一日，民主黨喺facebook罵民建聯「斷章取義」，「請你地唔好再up得就up（噏得就噏）」，搞到好尷尬。


Ann姐訪卿姐餘波

事緣Ann姐訪問中傾政改，問卿姐睇法，卿姐話好唔滿意人大8．31框架下，話限死兩至三名候選人，叫人點樣支持政改方案，而Ann姐最後仍好言相勸，禮貌式叫泛民一齊支持政改打圓場。


不過，民建聯fb噚日就share咗訪問片段，仲加咗留言，話「希望兩黨攜手合作通過政改方案」，以及「劉議員...今次要繼續靠您敝黨喇」。


民主黨見到即刻好緊張出post澄清，大罵豈有此理，怕人誤會，表明「我地既（嘅）立場好清晰，係反對依家依個提委會篩選，落實真普選！」

Ann姐事前唔知民建聯出post，知道事件鬧出風波後都好緊張，同意可能會令卿姐覺得尷尬，但相信卿姐會明白。Ann姐話佢當然好想各黨派一齊支持通過政改，但講到要兩黨「攜手合作」，可能唔係幾好，希望卿姐唔好介意。民建聯亦識做，之後刪咗嗰段留言。