應家柏跑兩場fit到漏油

【明報專訊】今屆渣馬繼續星光熠熠，有衛生局長高永文、副環境局長陸恭蕙、港大校長馬斐森等撐場，但馬會CEO應家柏就攞晒彩，後生時係職業足球員嘅佢家仲係「fit到漏油」，跑完10公里再跑1.8公里嘅領袖盃，都有氣有力，仲攞埋領袖盃季軍。


而高永文醫生跑完之後索晒氣咁話之前跑過沙田3公里賽，信心多咗，但Emily見佢猛話「畀我唞順條氣先」，仲同工作人員講「要拖我」，睇嚟下次參賽認真要練習多啲。陸恭蕙就話自己「跑得麻麻」，可能要練多啲跑。


工作至半夜 朝早7時仍練跑

港大校長馬斐森同現年76歲嘅港大校務委員會主席梁智鴻亦有參賽。不過，講到最犀利嘅，當然係同美國總商會前主席詹康信齊齊攞季軍嘅馬會CEO應家柏啦。


Emily仲聽馬會同事講應家柏熱愛運動，試過出外公幹做到三更半夜，但朝早7點就喺GYM見到應家柏練跑，唔怪得呢名前足球員體能保持得咁好。至於亞軍同冠軍就分別係香港嘉道理慈善基金會董事李文德同來寶集團行政總裁Yusuf Alireza。