卿姐最刻骨銘心的感情是……

【明報專訊】民建聯蔣麗芸（Ann）搞咗個網上會客室節目，今期訪問同佢一樣喺立法會出名講嘢大聲嘅民主黨主席劉慧卿。難得兩女子坐低談心，Ann單刀直入，話大家都知道卿姐有幾段感情，叫卿姐講吓邊一段感情最「刻骨銘心」。卿姐一向唔鍾意公開講私人事，但今次竟然話「刻骨銘心」呢個問題可以回答，但原來係「工作」！


如有真命天子 卿姐：隨緣啦

卿姐話，早兩年同秦家驄傾偈，對方用英文形容卿姐，「Emily, you are married to your work」，話卿姐同工作結咗婚喎。不過，卿姐話呢個形容唔正確，話自己應該係同香港嘅福祉結咗婚先啱！據傳媒報道，卿姐經歷過兩段婚姻，但佢同Ann講，自己係公眾人物，但家人、朋友唔係，所以唔想多講私人事。


不過，Ann未放棄，繼續問卿姐，話如果將來有真命天子，尋尋覓覓搵卿姐，卿姐又會唔會接受呢？卿姐聽到呢個問題即刻笑出嚟，話無所謂，「隨緣啦」，又話身為議員，市民隨時可以搵到佢，「唔使尋尋覓覓嘅！」