張達明父子為至愛齊跑

【明報專訊】噚日渣打馬拉松，唔少名人參與1.8公里嘅領袖盃，香港大學法律系首席講師張達明就自己報咗10公里賽事，囝囝亦有跑半馬，齊齊為香港防癌會籌款。


69分鐘完成10k

張達明話今次同囝囝參加渣馬，希望可以親力親為，為喺2007年因為乳癌過身嘅愛妻成立嘅香港防癌會「張謝寶英乳癌康復資助計劃」籌款。佢話噚日陰天唔太曬，但焗咗少少，加上前日朝早仲去踢波，所以體力差咁啲，有兩三段路要慢行，最終以約69分鐘完成10公里賽事。


18歲囝囝想修心理學

張達明又主動拉埋18歲嘅囝囝張劭朗一齊合照，張劭朗話自己平時有練開籃球，比賽前每星期練兩次跑備戰半馬，可惜啱啱病好，未能打破舊年紀錄。


就讀中六嘅張劭朗話暫時唔諗住繼承父業讀法律，而自己對心理學有興趣，因為自己之前面對失去至親都陷入低潮，「都帶咗唔少麻煩畀爸爸㗎」。佢希望入大學可以修讀相關科目，以過來人嘅經驗幫人走出創傷陰霾。