警隊檢討佔領或引入新手套

【明報專訊】上年佔領期間，警方曾經動用催淚彈、警棍甚至警犬，可謂「人力物力」盡出，令市民「大開眼界」。但喺旺角佔領區清場嗰幾日，曾因有警員戴上配置硬物嘅手套，令在場者恐慌。據了解，警隊正檢討佔領時所用裝備，認為上述手套本應供交通警員使用，考慮未來有類似嘅聚眾活動出現，可能會引入新手套應對。


旺角佔領區清場期間，現場有人發現警員嘅手套唔係一般黑色布手套，喺手背有硬物，當時有警隊中人透露，呢款手套主要畀交通警員用，清場時戴上，係為咗避免割傷。


據知，警隊過往會定期檢討裝備，佔領期間暫停咗，近日再開會商討，認為未來可能有類似嘅聚眾活動，考慮要引入新手套。此外，有警員反映身上嘅警械佩戴腰帶，長時間站立佩戴會有不適甚至刮損皮膚，所以都會考慮要唔要換，但就無確實時間表。


未計劃檢視佔領處理手法同程序

警隊雖然開始檢討裝備，但就好似未有計劃全盤檢視佔領行動嘅處理手法同程序等，亦擔心會影響現階段嘅調查同檢控工作咁話。