老馬有火 蔡堅想選立會

【明報專訊】外號「俠醫」嘅醫學會前會長蔡堅已經67歲，但無諗過退休，仲愈來愈活躍，老馬有火。佢之前已經話唔排除再選醫學會會長，噚日仲話連選立法會都有得諗，事關如果今日係佢做議員，就會鬧政府多啲。


唔排除再選醫學會會長

醫學會噚日設傳媒午宴，蔡堅一出場就大爆自己同人辦基金支援佔領者。佢強調自己中立，只係想幫人，唔怕銀行唔畀佢個基金開戶口，「只係做個relief fund，連呢啲都唔做得，真係要坐飛機走」。


既然咁多嘢睇唔過眼，有無諗過選立法會？蔡堅話「有呀」，後來佢補充話係可以考慮吓，要睇吓現任醫學界議員騮哥（梁家騮）係咪真係唔選啦，「佢好辛苦，又要湊仔，我半退休，多啲時間服務業界」。蔡堅仲話，如果今日係佢做議員，實行鬧多啲政府。


同收風者講政改咪夾硬來

蔡堅又話自己都有同中方「收風者」聯絡，佢同對方講明，政改唔可以夾硬來，否則一拍兩散。佢話，自己有時睇錯人，除咗選錯梁振英做特首，仲有現任醫學會會長史泰祖喎。


蔡堅噚日原本同史泰祖無乜交流，點知上屆醫學會會長謝鴻興拉埋佢兩個，蔡堅半推半就「交叉手」同史、謝手握手。今次係蔡史鬧不和後嘅第二次握手，蔡堅握完話覺得「被姦」，謝鴻興笑笑口話要番蔡堅。