阿董問「貴姓」原來未講完

【明報專訊】前特首董建華前日召開記者會讚《施政報告》，喺記者答問環節講咗句「貴姓呀，陳生？」而被廣泛報道，有網民懷疑董生記性係咪差咗呢？不過Emily睇番當時片段，扭到最大聲，當時董生成句係話「貴姓呀？陳生、係係。」


最後兩字「係係」發音細聲

有在場人士理解，前面一句真係問句，但後面一句就係確認對方係咪真係姓陳，但因為最後兩個字「係係」發音低沉兼且極細聲，所以大家都唔知董生當時嘅意思。


根據DBC電台嘅影片，董建華喺記者會一律都會問番記者個名。當時呢位陳姓記者一早已經自報姓名。不過，董生聽完問題後，一時反應唔到，再問呢名記者貴姓，問完問題，董生停頓咗一下，但唔知係咪記得番記者個名，所以就向住個記者講「陳生、係係」，仲一路點頭，有在場人士認為，董生只係想確認知道對方個名，唔係有心「明知故問」搞笑。


我哋曾經透過公關問吓董生邊個理解先準確，但公關話噚日接觸唔到董生攞回應。


總司令梁太

抱恙缺席活動

另外，啱啱做咗「香港青少年軍總會」總司令嘅特首夫人梁唐青儀，噚晚本來應承咗出席港台一活動，Emily一心諗住去現場問吓佢，青少年軍要點樣「報效祖國」，因為好多人關心，但噚日下晝主辦單位通知，話梁太稱抱恙不能出席。Emily向特首辦關心一下梁太病情，但特首辦話「沒有補充」。