又傳王健林入股馬體會

【明報專訊】萬達商業（3699）老闆王健林入股西甲球隊馬德里體育會呢單消息，由舊年傳到今年，噚日再有西班牙傳媒話，王健林豪掟4000萬歐元（約3.6億港元）入股馬體會兩成。查實王健林當年隊大連萬達都曾經係中國班霸，呢單消息真假暫時未肯定，但話唔定佢本人都真係對足球有啲情意結。


西班牙傳媒話，王健林同馬體會今日會搞記招，公布入股呢件大事，到時就知道呢單傳聞真假。王健林舊年已經用咗28億港紙，收購西班牙馬德里市西班牙大廈，如果今次「順手」買埋馬體會，話唔定可以畀球會用返。


查實喺2000年前甲A（當時中國最高級別聯賽）威盡一時嘅大連萬達，正正就係王健林一手搞起，不過當時盛傳佢因為不滿「黑哨」事件退出，如果轉戰西班牙，都可以叫做一圓足球夢。


[小琴密語 email: piano@mingpao.com]