$1400一盆 變色蘭花年宵首賣

【明報專訊】仲有約一個月就到羊年，今年雙春兼閏月，年花會喺和暖嘅新春提早盛開，不過適逢今年情人節喺大年初一（2月19日）前，早開嘅靚花就可以畀一班有情人買嚟另一半嘞。香港鮮花盆栽批發商會主席賴榮春估計，緊接嘅農曆新年可以延長市民嘅購買潮，預計銷情會唔錯。


情人節早過羊年 料助花銷情

有「蘭花大王」之稱嘅千葉園董事長楊小龍仲同Emily講，將喺年宵引入會隨溫度變色嘅全新蘭花品種「金磚富貴」，香港係全球首地發售。當氣溫低過18℃時，「金磚富貴」會呈橙紅色，氣溫回升至20℃嗰陣，會逐漸變成桃紅色，仲帶淡淡幽香，一花兩色，都幾過癮，但噚日向傳媒展示嘅就唔算太橙紅，只見一棵稍為淺色。「變色蘭花」售價唔平，一盆6株索價約1400元。


想經濟實惠啲嘅，「年花大王」賴榮春就推介圓碌碌，寓意財源滾滾、美滿團圓嘅「黃金乒乓菊」。配埋其他靚花如海棠、銀柳、紅掌等湊成嘅盆景花，花期可達一個月，之後仲可繼續種，售100至500元不等。賴榮春又預測今年新春雖然暖，但花農分階段種花，供應影響不大，花價按通脹升一至兩成。而下月4日率先喺東港城開幕嘅室內年宵市場，開市日會推出8蚊一枝嘅「『羊』眉得意」紫紅蝴蝶蘭，限量88枝。