港人對「制服誘惑」有熱情？

【明報專訊】香港青少年軍總會成立，連駐港解放軍都參與其中，令到唔少人擔心，噚日《人民日報》海外版就有一篇〈「制服團體」緣何受港人追捧〉嘅文章，談及參與制服團體有幾好，文章提到制服團體得到各界大力支持、備受港人追捧，仲話「港人對制服誘惑的熱情，不妨視為一種公民運動」喎，唔知大家認唔認同港人鍾意「制服誘惑」呢？

人民日報文章撐制服團體

文章強調，任何經政府註冊嘅青少年團體，都可以「合法地生存和開展活動」，又話制服團體係關注青年人離開校園後嘅生活，並介紹青少年軍有3個縱隊，又會舉辦「深受青少年歡迎」嘅大學生軍事生活體驗營、青少年軍事夏令營等，除咗步操，日後亦包括軍事訓練。


《人民日報》仲話，有港媒將香港人對制服團體嘅追捧稱為「制服誘惑」，不過Emily就無聽過喇。文章又話，中港融合過程中並非都係「甜蜜」，摩擦同誤解難免，但就話了解國情並唔係洗腦，而係有助青年人更好咁抓住人生定位。