阿董問記者﹕貴姓呀，陳生

【明報專訊】全國政協副主席、前特首董建華噚日開記招高調發表對特首梁振英《施政報告》嘅意見，係歷任特首前所未見，記招地點200幾平方呎嘅房足足迫咗半百記者，單計大攝錄機都有約20部，陣容同梁振英嘅施政報告記招有得揮。董伯伯話噚日係nice day所以出嚟開記招，心情唔錯嘅佢仲反問向佢提問嘅記者﹕「貴姓呀，陳生？」


記招期間有少少手震

董伯伯自去年9月以來，4個月內第3次喺前任特首辦見傳媒，佢有備而來，除準備咗5、6分鐘嘅發言稿，「貓紙」都有3、4張。董伯伯之前兩次見記者都企足全程，佢話家有做運動，但企得耐都會腳痛。


噚日近一小時嘅記招對董伯伯嚟講無問題，不過Emily就留意到佢有少少手震，雙手不時撳住講台以防手震。


董伯伯以「每次只答一條問題」為由，對尖銳問題避得就避，又講笑叫香港電台記者幫佢答問題。噚日有《蘋果日報》記者指出，梁振英呢份施政報告評分喺上任以來最低，問董伯伯係咪支持梁連任時，董伯伯一聽到，就反問點解《蘋果》成日有咁嘅說話出嚟，仲話《蘋果》記者應該會知佢嘅答案，話家講特首連任問題時間太早。