聖安德烈堂擴建 百年石牆變高牆

【明報專訊】擁有逾百年歷史嘅尖沙嘴地標聖安德烈堂，擴建工程接近完成，近日解開工程圍板，原來長100米嘅毛石擋土牆全部拆除，剩番西面嘅石門廊，新圍牆用麻石同混凝土建造，配合玻璃簷篷頂同玻璃門出入口，唔單止外貌走晒樣，新圍牆仲高咗好多，約有5米，較原有嘅砌石牆高出約1倍，市民企喺高牆之下嘅行人路，視線會受阻，睇唔到內裏情况，要企到對面嘅栢麗大道，先至睇到教堂。


長春社責政府保護古蹟不力

聖安德烈堂位於彌敦道138號，為九龍區歷史最悠久嘅基督教教堂，於1906年由遮打爵士捐資興建，2009年獲評定為一級歷史建築，同年屋宇署批准教會嘅擴建申請，斥資1.55億元興建「生命中心」，但會拆去整幅砌石牆，當時已引起爭議。事隔多年，如今尖沙嘴多咗一幅「高牆」，長春社高級公共事務經理李少文慨嘆，事件反映政府保護古蹟不力，未有喺緊急關頭，宣布聖安德烈堂做法定古蹟，結果與無數遭破壞嘅古蹟一樣，改建後變得不倫不類，破壞建築物嘅完整，但已經返唔到轉頭。