有話說﹕加大子女免稅額，提高出生率？

【明報專訊】上周三特首發表施政報告，提及會研究加大子女免稅額及推行15年免費教育，希望提高香港出生率咁話。但香港家長似乎唔多受落，上網睇吓家長討論區，家長都呻呢份施政報告「杯水車薪」。


梁永樂﹕居住託兒服務最困擾

Happy Mama同本刊專欄作家梁永樂傾過，身為一子一女之父，佢認為呢份施政報告「唔及格」。佢批評﹕「教育對成個社會咁重要，成份報告竟然都只得幾段有關教育。而且講得最多係姊妹學校咁枝節的事，而唔係家長最關心的事，例如語文政策等。」


對於加大子女免稅額，會唔會令香港家長想追多個，梁永樂認為最困擾香港家長的是人均居住面積同託兒服務不足的問題，呢兩個問題唔解決，就算加大免稅額都唔會提高香港生育率。


至於講咗好多年嘅15年免費教育，家仲係研究階段，要等年中先有報告公布。替兩歲女兒睇緊幼稚園資料的梁永樂，對此持觀望態度﹕「學券制下，好多家長心儀的幼稚園因為唔想受當局限制，寧願唔參加。15年免費教育下，都唔知有幾多間受歡迎的幼稚園會參加資助計劃？」


全日幼園 變相減少學額

佢最擔心政府表示，會研究如何鼓勵幼稚園提供全日服務﹕「老師人手唔會一下子增多，轉全日服務就代表原本分上下午班的幼稚園學額有可能減半，咁家長想子女入讀心儀幼稚園的機會就更少。」呢份施政報告，似乎幫唔到幾多香港家長，反而令佢哋添上更多擔心。競選特首時，梁振英曾承諾會帶埋一支筆、一本簿、一張櫈落區聽民意，唔知佢準備呢份施政報告時，又同幾多家長傾過呢？


文﹕Happy Mama