中大生搞校內首間二手書店

【明報專訊】新一份《施政報告》提及成立3億元嘅「青年發展基金」助年輕人創業，不過，Emily留意到中大善衡書院舊年率先推出「青年才俊計劃」，鼓勵學生同校友將創意轉化為商機，實現創業夢。首屆脫穎而出嘅6個學生同校友創辦咗「逢時書室」，呢間唔係主流書店，而係校內首間二手書店，希望打破傳統書店格局，令同學仔接觸主流暢銷書以外嘅書，亦會舉辦各類型文化活動，擴闊同學仔嘅閱讀體驗。


書院計劃鼓勵創業

計劃去年中接受申請，申請人需要向評審簡介創業計劃，評審按計劃嘅財務估算、創意、生意效益同對社會關注度遴選。今次贏出嘅「逢時書室」，未來一年會喺中大陳震夏館地下一間300平方呎房間開檔，負責嘅學生同校友每月畀書院1200元管理費，其間商學院嘅教授會做創業顧問，幫學生累積營商經驗，開拓商界網絡。