渣馬跑手 發起噓一哥

【明報專訊】嚟緊周日（1月25日）舉行嘅渣打馬拉松，邀請咗政務司長林鄭月娥同警務處長曾偉雄為42公里全馬賽事「鳴槍」，主持起跑儀式，一班資深馬拉松跑手喺facebook發起咗「召集渣馬跑手，噓爆禿鷹林鄭」行動，截至噚晚有近300人喺fb「報名」響應。


不滿警濫用暴力包庇

其中一名活動發起人同Emily講，佢不滿「雨傘運動」期間警隊濫用暴力、包庇涉暗角毆打示威者嘅警員等，所以要踩「一哥」場，其次先針對要市民就政改方案「袋住先」嘅林鄭月娥。佢哋又呼籲各個跑手託朋友喺終點附近遞黃傘畀佢哋，大家一起撐傘衝線。


籲撐傘衝線

當日首場全馬賽事喺清晨6點10分於尖沙嘴起跑，有網民話，當日唔跑都特登去「噓」喎。而就點樣應對網民行動，至噚晚截稿前渣馬發言人仍未回覆。