「真有其人」 CY：花墟遇5歲童

【明報專訊】今年《施政報告》提及有個「5歲小童」問特首梁振英（CY）第時大個之後可以住喺邊，令呢個小童成為社會熱話，就連立法會議員林大輝都質疑小童係虛構人物。CY噚日接受港台英文台節目訪問，就為5歲小童解畫，話係「真有其人」（real child），係幾個月前一個周日喺旺角花墟遇到佢嘅。


話說噚日朝早CY接受港台英文台嘅施政報告烽煙節目訪問，其間有聽眾好關注佢到底做咗幾多工夫喺兒童政策，CY就話一向好重視兒童教育、福利等政策，就連施政報告封面都有放嬰兒同小孩照片，主持人就趁機問佢，報告入面問長大住邊嘅5歲小童到底係真人定虛構，CY就話係真嘅，係佢喺早幾個月去旺角花墟時遇到呢個女童。


形容女童問住邊 「聰明」

不過主持人都好奇，咁細個點會識問呢啲問題呢？CY就話可能係因為家長或者佢嘅家人一向都討論房屋問題喎，佢仲形容呢個小童「聰明」（smart）