新巴城巴推兩優惠

【明報專訊】新巴同城巴噚日宣布好消息，按照同政府協議有關回饋乘客嘅安排，將會喺星期日（18號）開始，提供兩項車費優惠，為期12個禮拜至到4月11號。當中用緊八達通嘅乘客，如果乘搭新巴同城巴獨營嘅33條過海路線，例如由屯門龍門居去銅鑼灣摩頓台嘅962號線、由天水圍去金鐘嘅967號線等，即日回程可以有八折車費折扣。


至於其他新巴同城巴路線，乘客只要每日即日乘搭兩程路線，第二程可以獲減兩元車費，小童同長者則獲減一元，但過海、機場、北大嶼山同迪士尼樂園路線除外。


至於65歲或以上長者及殘疾人士，如果享有兩項優惠後車費仍高過兩蚊，可以繼續以每程兩蚊乘搭每程路線。新巴城巴又話，由於車費系統喺每日凌晨3點會重新計算，因此「即日」嘅定義係每日凌晨3點至到翌日凌晨2點59分，即係話通宵期間仍可享有優惠。