梁太細女齊撐CY

【明報專訊】特首梁振英（CY）噚日去立會宣讀佢任內第三份《施政報告》，除咗3司12局官員，部分行政會議成員，以及梁太唐青儀、喺外國返咗嚟嘅細女梁頌昕，噚日都有現身立法會公眾席，遙距為CY打氣。梁太一身粉紅現身，佢聽丈夫讀施政報告時表情多多，又將耳筒調轉戴，都幾趣怪。


唔知係咪今年份施政報告較長，中段時罕有地小休數分鐘，梁太母女亦行咗出嚟飲杯水、鬆一鬆，梁太見到記者影相，好友善咁笑一笑，但被問到見到CY畀人鬧成咁（開會初段陳偉業狂鬧CY），有無覺得心痛？梁太就無回應喇。兩母女又對走廊掛嘅舊議員合照好感興趣，手指指談論一番。


議員玩手機 黃國健呻悶

兩母女精神奕奕咁支持CY，但建制派議員或者官員就未必喇，工聯會黃國健中段都瞓着咗，小休時又向記者大呻好悶；部分議員專注玩手機，好似自由黨張宇人就睇BB相、經民聯石禮謙亦不時閉目養神。教育局長吳克儉亦被人影到佢疑似瞓覺，但佢對此好大反應，下午立即透過發言人表示自己「全程用心聆聽」，仲話對報道失實表示遺憾喎。