「五月天」啟德演唱現羅生門

【明報專訊】要令青年人消消氣，好似係政府其中一個重點目標。噚日《文匯報》引述消息話，政府正邀請慈善機構5月舉辦大型音樂會，選址喺啟德郵輪碼頭，頭炮會係台灣樂隊「五月天」。不過，過去9年都為「五月天」喺香港搞演唱會嘅主辦單位，就話至今未獲政府接觸，亦未收到任何合作方案咁話，覺得呢個消息有啲奇怪。


傳媒稱「5月來港」

長期拍檔：未獲政府接觸

「五月天」今年計劃嚟香港搞10周年演唱會，特高娛樂有限公司發言人梁先生話，以前演唱會一直喺紅館做，但今年5月無期，正物色其他場地，包括添馬公園、啟德郵輪碼頭及機場亞博，家仍喺睇場階段，未有定案。佢話，理解一旦喺啟德郵輪碼頭外舉行演唱會，必須係慈善性質，但「五月天」認為唔係問題，但目前連演唱會地點都未確定，唔明點解傳媒會咁報道。


地政總署發言人話，未收到有機構申請5月使用啟德用地。演出業協會（香港）亦話，對郵輪碼頭對出場地計劃5月份舉行演唱會不知情。