區議員帶高登仔落區

【明報專訊】一班高登仔早排話想選區議會，唔好以為得個講字，民主黨沙田區議員麥潤培，呢排就經常帶高登仔落區了解地區問題，為參選鋪定路，噚日就去咗九龍東。麥潤培話，佢係用個人身分幫手畀意見。但點解佢會幫高登仔？因為佢自己都係高登仔囉。


麥潤培助10高登仔四圍睇

麥潤培話，家主要協助10個高登仔，已經去過新界東、新界西同九龍東合共8個選區；嚟緊仲會去埋九龍西。至於係邊一區，麥潤培唔肯講，只係話如果出現同泛民主派撞區嘅話，相信可能要做一啲協調工作。


佢話，自己唔係負責幫高登仔參選，只係想鼓勵多啲年輕人做社區服務，所以提供少少協助，等佢哋認識地區問題同埋有咩要留意，包括睇吓有咩民生設施損壞。