石永泰指公會不幫親 譚允芝料任新主席

【明報專訊】大律師公會今個星期四改選，Emily聽講新一屆主席將會係女將、資深大律師譚允芝（Winnie）。即將落莊嘅公會主席石永泰（Paul）噚日喺法律年開幕禮不忘繼續為公會護航，佢話雖然好多人都話大律師公會幫邊個，阿Paul就好堅決咁話，公會一直幫理不幫親，無論對方係邊位，都只會「是其是，非其非」。


Winnie嘅專長係比較冷門嘅知識產權法，佢前夫莫樹聯係資深大律師同基本法委員會委員。當年佢哋一齊升任資深大律師時已經離咗婚。


早幾日，曾經係大律師公會主席嘅余若薇（Audrey）喺本報專欄公開批評大律師公會，話只批評佔領堵路帶來不便，但人大「8•31」決定違憲同禁制令都無發表聲明回應。身為阿仙奴fans嘅阿Paul就用番足球回應，佢話好多人以為公會係某些政黨嘅後備球員，有需要時就呼召出嚟用「法治角度」為對方嘅政治行為護航，但咁就錯晒，佢強調公會獨立於任何建制或者政黨，一直幫理不幫親。