大學生畢業輪公屋 陳振彬：冇理由放棄自己

【明報專訊】「自暴自棄」有新定義乎？事緣56歲嘅青年事務委員會主席陳振彬喺有線新聞嘅訪問中話，「唔好一大學畢業就去申請公屋，我覺得呢個都係心傷嘅問題嚟，冇理由咁快放棄自己，我做5、6年嘢，我就開始可以畀首期去供間樓屬於自己，呢個先係年輕人嘅朝氣，所以我覺得喺理念上有些少歪曲咗」。陳振彬呢番話即刻喺網上廣傳，唔少人都懷疑，家啲樓閒閒哋都400萬元，有乜嘢工畢業後做5、6年就可以儲到首期呢？


「我工作6年可畀首期」

Emily睇番以前陳振彬話當年嘅訪問，佢1976年中學畢業後，就經朋友介紹去咗佳藝顧綉廠做文員同學師，1980年就自己開咗間製衣廠，即係搞生意做工業。


當年樓價冇家咁高，而且香港有工業，創業容易得多，咁現時樓價又點呢？Emily計過，一間實用面積300方呎單位要400萬，銀行七成按揭就要畀120萬首期，即係每個月要儲1.6萬元，之後仲要月供1.25萬元，但唔好以為搵到1.6萬元人工唔飲唔食就得，因為銀行批按揭要計月入比例，即係如果月供1.25萬元，你嘅月入就要至少2.5萬元。Emily想問陳振彬，唔知香港有幾多畢業生可以一出道就搵到2.5萬元一個月呢？


「放棄」呢兩個字真係唔好隨便講，好似工聯會吳秋北上月接受《明報》訪問時，話如果年輕人要用極端手段爭普選，社會應該「放棄」佢哋。呢番言論都引起好多爭議。