吳克儉再約八大校董會

【明報專訊】佔領期間，大學嘅取態備受關注，港區人大代表、城大校董會主席胡曉明話，原來9月嗰陣，教育局長吳克儉曾經搵埋幾間大學嘅校董會主席見面，睇吓大家點應變。胡曉明透露，局方關注嘅，包括如果校園被佔領，大學校長使唔使搵後備辦公室、要唔要加強網絡保安等。胡曉明仲大爆前幾日撞到吳克儉，對方仲話日內會透過副局長楊潤雄再約八大校董會，局方都唔知幾咁關心。


關心校園被佔領對策

雖然教育局關注，但胡曉明話，局方只係話畀大學聽教育局會點做，絕對無教大學做啲乜，強調大學點做由大學自己決定。佔領已經結束，胡曉明話，暫時只係知道有一個佢哋嘅學生被捕。至於教員如果參與又會點處理呢？佢話，如果教員違反校規會有委員會處理，有處分都只係會禮貌上知會佢，佢無權決定點處分。


真普聯召集人、香港城市大學政治學講座教授鄭宇碩早排畀人投訴學術不誠實，胡曉明話，唔知道投訴處理進度，話呢啲係教務會嘅事，仲話呢啲嘢「唔知好過知」喎！