李嘉誠周凱旋齊齊送機

【明報專訊】亞洲首富李嘉誠（前左）愈來愈精靈，小琴講緊嘅係佢噚日以神秘嘉賓身分，同紅顏知己周凱旋（前右）齊現身機場，為參加科技夾子以色列遊學團約60位學生送行，仲寄語學生，叫佢哋「睇多啲，諗多啲，希望大家好高興返嚟，平安返嚟」。


話說噚日係李嘉誠基金會同以色列理工學院合辦的「科技夾子．營」百人師生團今啟程出發去以色列，展開為期四天之旅，事前一班學生、小琴同其他傳媒都唔知超人會現身，去到機場時公關先至神神秘秘話有「特別嘉賓」送機，而且仲突然多咗一班機場特警喺附近部署，自然係要保護超人安全啦。


超人現身自然引起唔少騷動，甚至有外籍人士上前要求同超人玩selfie，超人逗留咗十幾分鐘就離開，但佢依然爭取時間同學生講多兩句，一直強調創意教育是投資未來關鍵嘅佢，揮手道別時鼓勵同學們：「看多點、想多點、Have Fun、互相照顧。」


email: piano@mingpao.com

[小琴密語]