就職廠商會長李秀恒好興奮

【明報專訊】廠商會早前內部經過激烈選舉，終於由全國政協委員李秀恒（圖）勝出，出任會長一職，噚晚舉行會董就職儀式，李秀恒成晚滿場飛，致辭時更極為興奮，完全唔跟稿讀，發言再三多謝卸任會長嘅施榮懷，喺全場掌聲下，突然走向坐喺遠處嘅施榮懷度，同對方擁抱致謝，相信唔少人都覺得幾誇張。


李秀恒話佢會「珍惜好日子，創造新未來」，唔知係咪廠商會選舉時競爭十分激烈，佢都想同對家陣營修補關係，所以亦特別講到要團結一致。佢話家香港社會已經日日吵鬧，唔少人返屋企都想熄電視，所以商界更需要團結一致，更用力支持政府嘅工作喎。


成立特別基金 先捐100萬

做會長，「科水」當然唔少得，李秀恒就宣布成立一個特別基金，由廠商會託管，用於社會服務同發展會務，佢自己就先捐出100萬做首年經費。


廠商會換屆，官員畀面出席，除咗特首梁振英、政務司長林鄭月娥外，有至少8名局長出現，部分更留低晚宴。