前「十子」fb現身徐少驊：唔評佔領

【明報專訊】原佔中十子之一徐少驊舊年突然退出，9月更接受傳媒訪問，稱爭取真普選要有「合法途徑」，之後一段日子佢都無咗蹤影，亦無update過facebook。噚日Emily見佢突然喺facebook寫書評，就即刻打電話畀佢傾咗幾句。


要佢交代係合理要求

徐少驊開宗明義就話，點都唔會評論早前嘅佔領行動，亦唔會講過去幾個月做咗啲乜。本身任職先達智能有限公司行政總裁嘅佢透露，舊年8月已經辭職，自己係閒人一個，未來會寫作，唔會迴避政治題材，「立場新聞」開張都有邀請佢呢個「前主場博客」投稿。


坊間批評不絕，但徐少驊就話自己相信蔡東豪，又讚佢開辦「立場」係有勇氣、有負擔嘅一件事。佢認為要求蔡東豪或者佢要交代係一個合理要求，佢明白亦都理解，「但係做唔做到，就係另一回事」。佢話每個人可以有自己嘅選擇，有人可以因為佢哋唔交代，而唔睇佢寫嘅嘢或者創辦嘅媒體，「唔相信我係佢哋嘅自由」。但佢唔認同有人基於猜度就作猛烈人身攻擊，希望大家可以互相尊重咁話。


被問到驚唔驚自己會好似蔡東豪咁被大肆批評，佢話唔驚得咁多，大家點講佢都無辦法，如果因為驚被人批評就放棄言論自由，佢話比起極權社會更差，因為喺facebook或網媒寫作係基本嘅自由。