東亞撳錢唔使卡 照顧「大頭蝦」

【明報專訊】有唔少人成日唔記得帶銀包，或者試過行行下街唔見咗銀包、搭的士時漏低咗。東亞銀行（0023）就話，將推出自動櫃員機無卡提款服務，照顧呢班大頭蝦客戶。


要用呢項服務，一定要有東亞網上理財帳戶，而且另外搵電腦上網。基於安全理由，唔可以搵自己部電話登入喎。登入咗網上戶口後，輸入電話號碼同提取金額。銀行就會將一個提款號碼通過短訊寄去你嘅電話。


除咗呢個提款號碼，你仲要輸入一個事先自設嘅驗證碼，銀行會再發一個密碼畀你作雙重認證，輸入之後先攞到錢。如果喺街度搵唔到電腦，就唯有向有東亞網上理財戶口嘅親友幫忙。


東亞話，家只等金管局批准，預計呢一兩個月內推出。不過，以上程序咁繁複，而且暫時只限於香港，每日最多只可提款兩次，合共最多1000蚊，唔知有幾多人會真係用呢個服務呢？


[小琴密語]