佔領後學民多200義工

【明報專訊】唔少泛民政黨擔心，佔領運動之後會失去年輕人支持，不過學民思潮就應該唔使驚，學民思潮發言人黎汶洛噚日同Emily講，喺佔領後多咗200個義工。黎汶洛話，學民原本有大約800至1000名義工，咁計法，佔領後義工人數增加咗20%。


邀4政界人物談重啟政改

學民噚日公布2015年行動，一口氣發公開信，邀請社會上「有影響力」人士公開對話，討論重啟政改化解社會危機，被學民揀中嘅政界人物包括﹕行會召集人林煥光、成員陳智思，全國政協常委唐英年，同埋前財政司長梁錦松。


點解學民偏偏睇中呢4位仁兄？學民話，4人嘅共通點係曾經公開發表過支持對話嘅言論。學民思潮話早前多次要求同政府對話被拒絕，所以期望可以同4個政界人士討論。


黎汶洛話，佢哋計劃喺港府落區搞第二階段諮詢時，喺場內、場外示威，仲可能會搵佔中防線組嘅人一齊行動。佢哋希望可以喺1月中至2月呢段時間，同4名政界人士個別公開對話。黎汶洛話，如果無人回覆，佢哋會繼續搵其他人，例如黃之鋒搞國教科罷課時嘅「老朋友」、行會成員胡紅玉。


不過，唐英年就回應傳媒話，想等政府推出第二輪政改諮詢後了解詳情，先決定係咪同學民思潮會面。