70議員長毛見報最多

【明報專訊】2014年剛過去，Emily做過小統計，發現以去年見報文章次數統計，70名立法會議員中，社民連梁國雄（長毛）曝光率爆燈，達到6237次，即平均每日有17篇報道，仲多過主席曾鈺成。至於包尾嘅係勞工界嘅潘兆平，全年見報文章150次，即兩日都無一篇。不過，正如潘兆平所講，有啲工作議員做咗都無傳媒報道，而深入睇番啲有關議員嘅新聞，有啲係正面，亦可能係人哋鬧佢，所以畀人鬧得多，都有機會增加曝光率。


傳統功能組別議員 見報率低

長毛同Emily講，會平常心看待結果，佢仲一臉豁達咁話，從來唔關心傳媒報道，「只問耕耘，不問收穫」，會繼續做認為對市民好嘅事。70名立法會議員，功能組別及直選各佔一半，而以見報次數計算，最多嘅首9個都係直選議員，第10位係超級區議員何俊仁，而普遍嚟講，傳統功能組別議員嘅見報率都係較低。


長毛就認為，功能組別嘅議員主要係向小眾負責，所以唔使做咁多嘢，唔需要畀大眾知道佢哋做緊乜嘢。值得留意嘅係，長毛喺3份親建制報章都出現過1138次，換言之，長毛畀人點名批評嘅次數都唔少。


排榜尾嘅潘兆平就話，能唔能夠見報，唔係佢可以控制，佢亦尊重傳媒報道，「無乜嘢話公唔公平」。佢明白自己會議出席率高，唔代表見報率高，未來會繼續專注勞工事務嘅議題，包括爭取標準工時立法，亦會繼續要求政府關注近年地盤工業意外增多嘅問題。


戴耀廷曝光率僅次梁振英

Emily用新聞搜尋器wisenews統計議員2014年喺香港「報刊」媒體見報文章數目。不過，舊年最高見報率嘅本地政治人物，估計應該係特首梁振英，有52,269篇。舊年佔領運動嘅風雲人物戴耀廷有5871篇；學民思潮黃之鋒有3732篇，反佔中嘅周融都唔差，有1873篇，見報率多過好多議員。