龍光「百變」太子女

【明報專訊】早前福布斯公布，深圳龍光地產（3380）太子女、年僅24歲嘅紀凱婷，已經成為全球富豪榜上最年輕嘅富豪。通常大家聽到太子女，都會有興趣問聲「靚唔靚女」。如果Google呢位太子女嘅名，會見到幾張超級靚女相，明星相十足，非常上鏡。唯獨有一張出自人民網嘅頒獎現場相，雖然氣質亦幾端莊，但相較於前幾張就的確有啲唔同。究竟係因為美圖工具幫手美肌瘦面嘅功能太強大，定係出現咗碧桂園（2007）太子女楊惠妍羅生門翻版呢？


26歲就登上胡潤富豪榜嘅楊惠妍幾乎不公開露面，網上開始悄然流傳某位日本明星、同埋一位車模嘅相，指認係楊惠妍，惟見過真人嘅消息人士都話真人同相相差甚遠。


剛成全球最年輕富豪

不過其實個樣係點真係唔重要，總之阿爸畀嘅錢就係實實在在嘅。紀凱婷係龍光地產主席紀海鵬個女，通過不同公司及家族信託，年紀輕輕就持有龍光地產85%股權，身價合計約13億美元（約100億元）。


email: piano@mingpao.com

[小琴密語]