曾鈺成寫「法」 為政改許願

【明報專訊】民建聯早前舉辦年度漢字選舉，過去一年社會討論唔少法治問題，今次選舉最終由「法」字獲得最高票當選。本身係民建聯會務顧問嘅立法會主席曾鈺成，噚日就即席揮毫寫咗個「法」字，雖然建制派鬧爆佔領行動，但曾主席噚日就話，佔領行動令社會可以討論法治問題，係好事喎。


佔領令社會討論法治 係好事

曾主席話，法治係香港嘅核心價值，但有唔少人認為，有更高理想可以凌駕法律上，唔守法亦唔等於犯法，佢覺得社會應該反思吓法治意義何在，例如如果想放棄法治又會對社會有乜嘢影響呀咁。佢覺得如果為因為崇高理想就可以挑戰法律，呢個信念推向極端，就可能會跌入深淵，係錯誤做法。


「愛」字第二 「穩」字第三

噚日元旦，或者曾主席都好着緊政改方案，佢就主動同記者分享新年願望，話唯一嘅願望係政改通過。講番漢字選舉，今次民建聯總共收到4631份投票表格，有效票數就有4450張，「法」字有1133票，其次就係有849票嘅「愛」字，「穩」字亦有541票排第三。