愛港之聲大計 鐘樓定期搞論壇

【明報專訊】佔領運動雖完結，但因反佔中而起嘅「愛港之聲」，會繼續有活動搞，1月1日會舉行嘉年華，地點喺中環遮打花園。愛港之聲主席高達斌話，唔喺金鐘搞唔係要避開仍喺立法會外嘅佔領者，而係book唔到場，佢仲話已邀請幾個佔領者到場討論，拍心口話會全程保護對方，又話對方會積極考慮參加。


元旦嘉年華 邀佔領者討論

今年愛港之聲嘅元旦嘉年華會以「愛香港，愛鄰舍，愛家人」為主題，但今年就無「捧政府」嘅字眼，高達斌就解釋，愛香港即係愛埋政府。佢話，即使未來政改被否決，都唔會覺得係好大不了嘅事，而佢哋未來會支持政府繼續推政改，例如落區呼籲市民登記做選民，愛港之聲亦會積極派人出選。高達斌仲話，佢哋喺立法會表決政改方案時，會動員去立法會支持建制派議員，但講明唔係包圍立法會。


愛港之聲噚日仲公布咗來年計劃，包括會隔個周日下午3點喺尖沙嘴鐘樓搞論壇，歡迎不同政見者參加，希望可以成為香港嘅海德公園喎。被問到係咪不滿港台《城市論壇》所以自搞論壇，高達斌就話覺得有啲節目有時太一面倒，所以自己試吓搞。