光明磊落博物館 盼助市民抒發

【明報專訊】社總盼市民捐展品

佔領行動其間，警方執法受到質疑，警隊民望見回歸以來新低，社會工作者總工會（社總）最近搞咗個 「光明磊落博物館」，一班社工早前發現唔少旺角佔領區者，經歷過10月3號警方暴力執法後，都產生負面情緒甚至發噩夢，於是設立「博物館」，希望治療市民身心傷害。社總代表倫智偉指市民可透過提供展品，幫助佢哋抒發情緒。


參觀者：皮革槌最深刻

博物館展出30幾個展品，包括被警方扯爛嘅衣物、防禦警察嘅浮板等，亦播放多條傳媒拍到警方被指暴力行為嘅片段。倫智偉話，展品係喺前線佔領者中取得，展覽只係試吓水溫，佢希望有多啲市民捐出展品及分享背後嘅故事，日後可以喺唔同地方再次展出。


Emily同去參觀嘅公務員李小姐傾過，佢話佔領行動令佢感受到警方執法好暴力，唔明白點解警察受過專業訓練、有嚴格規定仍亂打人，又當示威者「係狗咁趕」，對警察感到好失望、心痛，佢話展品「皮革槌」最深刻，令佢聯想警察用警棍打人嘅情景。


「光明磊落博物館」由噚日起一連4日（28至31日），喺社總旺角會址（上海街上海中心4樓）舉行，市民可免費參觀。