港童學大戲變「三不怕」

【明報專訊】香港查篤撐兒童粵劇協會透過教小朋友做粵劇教小朋友德育，令港孩學識堅持及同其他人合作。有小朋友學咗一年粵劇之後，成個人進步咗，變成「三不怕」。


唔怕吃苦犯錯面對群眾

鄭先生話，仔仔天昊學粵劇，係因為前年同一班家長睇咗一次查篤撐嘅表演，一睇之下驚為天人，佢話：「小朋友藝術上梗係不及大老倌，但係好神奇，佢哋可以做到完整兩個鐘嘅演出，我哋仲要睇得明。」之後鄭先生等到仔仔夠4歲可以入「查篤撐」，就即刻送佢去學。鄭先生話仔仔學咗粵劇一年後，個人進步好多，變成「三不怕」﹕一、 唔怕吃苦；二、 唔怕犯錯；三、 唔怕面對群眾。


小朋友互相鞭策

鄭先生仲話，粵劇可以訓練到小朋友喺學校學唔到嘅素質，例如點樣應變同互相合作，而且小朋友之間會比較，例如人哋壓到腿我壓唔到，小朋友返到屋企就會努力練壓腿，唔使家長逼，小朋友間互相推動大家進步，對小朋友個人成長幫助好大。


香港查篤撐兒童粵劇協會今個月底去佛山市同佛山市第一小學結盟，19個小演員重會喺當地表演一套長兩粒鐘、由「查篤撐」主席馬曼霞老師寫嘅兒童粵劇《灶王爺爺》。