新同盟中韓混血兒吸票

【明報專訊】佔領之後，有「高登仔」話有意參加2015年區議會選舉，牽制保皇黨嘅部署，等建制派候選人冇得自動當選咁話。上一屆立法會選舉得到「高登仔」支持嘅新民主同盟范國威話，好樂意同高登仔分享選戰經驗，例如點樣應付抹黑、防範跌落選舉陷阱等。范國威話，好想見到網民「由鍵盤戰士化身街頭戰士」，但就希望大家喺下年區議會選舉協調好，唔好撞區。


期待網民變「街頭戰士」

范國威噚日同新民主同盟新一屆執委會成員同記者茶敘，新執委中有兩位90後成員，分別係前學民思潮成員古俊軒，以及「中韓混血兒」陳兆陽。 陳兆陽笑住話不時會搞韓語交流班，吸引到唔少街坊參加。家正值吹起韓風，唔知呢位「中韓混血兒」可否為新同盟吸納多些「阿豬媽」粉絲呢？


望來屆有八成勝出率

仲有唔夠一年就係區議會選舉，新同盟召集人關永業話，上屆區議會選舉，佢哋有八成嘅勝出率，好希望來屆都可以力保呢個成績。為咗迎戰，范國威話未來會落區尋找「雨傘首投族」，協助年輕人登記做選民。另外，希望透過後生仔同家人討論政治，爭取家中年長者支持民主派，由家庭開始抗衡建制派嘅蛇齋餅糉。