新聞類別
財經
詳情#
【明報專訊】A股升到嘭嘭聲，最受惠嘅當然係券商股。噚日微博就瘋轉一篇文，話中信証券（6030）嘅市值已超越德銀，成為全球第4大券商，總有一日會超越全球最大嘅高盛"口添"。
"口依"家全球十大券商，內地券商包辦5個席位，的確好威水。點解覺得中信終會超越高盛呢？文章作者就話，自2008年金融危機後，外資行經歷緊去槓桿嘅過程，反而中資行業務進入快速增長階段，情况同外資行啱啱相反，所以中信仲有好大嘅增長空間。
中國人盲追大市值
小琴覺得，中國人骨子裏有一種「超英趕美」嘅基因，對市值有一種莫名其妙嘅追求。咁啱噚日有個芬佬朋友同小琴講，外國投資者的確鍾意大市值嘅公司，但估值同樣好重要，內地券商股"口依"家閒閒地都3、4倍市帳率，幾十倍市盈率，唔係仲衝入去嘛？
有人盲目亦有人清醒，有內地網友見到呢篇文，第一個反應係﹕「還在吹？」可想而知內地股民都唔係個個咁癲狂。有網友仲話，想當年中石油（0857）市值都超越晒外國大油企，結果係點？中石油A股股價當年最高去到40幾蚊，一場海嘯就得番幾蚊，諗起都驚呀！
[小琴密語 email:piano@mingpao.com]
留言 (0)
