【明報專訊】港交所（0388）行政總裁李小加（圖）雖然已經有3個仔女，不過仍然保持童真，噚日寫咗封信畀聖誕老人，一時話自己瘦咗兩磅，一時又讚吓自己間LME餐廳，內容天花龍鳳之餘仲好有玄機，例如佢話想改建間屋等阿拉伯朋友嚟做客，雖然無清楚講到係邊個朋友，但小琴諗就算聖誕老人唔識中文，都估到佢想講嘅，就係香港裝唔落、坐咗飛氈去美國落腳嘅阿里巴巴與40大盜啦。
小加同聖誕老人講，今年一群遠道從阿拉伯嚟嘅朋友原本打算嚟做客，但最後未能如願，因為要接待佢哋，就要造大間屋，但咁大動作要先問准左鄰右里先可以開工，好在家已討論緊係咪應該改建。
講真，佢班阿拉伯朋友成40個咁多，人人都鍾意向佢哋買野，佢哋加埋等於一個亞洲首富，仲有米過誠哥，香港咁細，如果一定要佢哋嚟，真係要做大間屋先。小琴覺得，呢個聖誕願望或者出年就可以實現，因為啲左鄰右里，例如小加舊年發夢時夢見嘅道德先生佢哋，都收晒聲唔敢再講，我諗都可以請定裝修師傅。
相信明年滬港通大橋會更熱鬧
除咗阿拉伯朋友外，其實盧森堡嘅朋友都好想嚟行下條滬港通大橋，不過家仲未得，搞到呢條橋開通咗個幾月都無咩車行。小加就話，會完善橋上嘅指示牌、加油站同快餐店等配套設施，相信出年呢座大橋一定會變得更熱鬧，到時有可能要起新嘅橋。計我話點都要等盧森堡朋友嚟咗先，更重要係畀唔夠50萬蚊嘅親愛同胞都可以行呢條橋，咁就唔驚無人行。
講完阿拉伯朋友同滬港通大橋，小加連LME餐廳都講埋，但小琴覺得高潮位係佢話自己成功減肥，重點係一年瘦咗兩磅！如果瘦兩磅都算減肥成功，小琴同一班女仔朋友都唔使咁愁。至於因咩事令小加「清瘦」咗，唔係滬港通又唔係40大盜，係因為同深交所踢咗場友誼波。場波就1比1打和，其實小加只係踢咗半場，佢自己都話基本上無掂過個波，但都感到好自豪喎。讀者們千祈唔好笑，講到波呢家嘢，個波喺人地度幾時都好過喺自己度。
email: piano@mingpao.com
[小琴密語]
新聞類別
財經
詳情#
留言 (0)
