民主黨中常委多乳鴿 平均41歲

【明報專訊】新一屆民主黨中委會噚日首次開會，選出新一屆秘書長、司庫同常委會成員。隨着張文光、李永達、何俊仁同埋楊森等「大佬」唔選中常委，交棒畀一班「乳鴿」，令今屆中常委嘅平均年齡亦由上屆嘅47.3歲，大跌至41.1歲。


民主黨新一屆秘書長會由李永成接任，而民主黨就開多咗個副秘書長職位，由中委會內年紀第二大、現年61歲嘅李建賢出任，至於年紀最大嘅係邊個？就係62歲嘅民主黨主席劉慧卿嘞。


今屆中委會都有唔少年輕面孔，例如司庫由30歲未到嘅袁海文出任，接替選主席失敗嘅吳永輝；同樣曾經挑戰主席寶座嘅區諾軒，就會接替中委選舉「票王」柯耀林，做政策行動部部長。另外，中委會選舉得票第二多嘅許智峯亦成功躋身常委之列。