石仔重提死亡邊緣勉同輩

【明報專訊】喺仁川亞運為香港奪取跳馬「第一金」嘅體操運動員石偉雄（石仔，圖），15歲時參加全國賽時試過頸椎移位，佢日前接受馬會刊物《駿步人生》專訪，就提到當時情况有幾嚴重，話係介乎「癱瘓與死亡」之間，花咗差唔多成年先康復，家人更加唔想佢再練習。佢嗰時要每日求石媽媽，甚至下跪哀求，先至令媽媽回心轉意。


石仔話，當年佢除咗頸椎移位外，頸椎仲有碎骨、軟骨亦都壓壞，返香港先知道問題咁嚴重。但佢當年喺病牀時，已經不斷諗康復時間、下次比賽可以做邊啲動作，咁先令到自己無放棄。問到佢有乜嘢同時下年輕人講，石仔話每個人選擇嘅路都不同，相信佢哋有自己目標，當一次做得不如意時，唔好因為一兩次失敗就放棄。


展望來年，石仔希望能夠喺2015年嘅體操世界錦標賽、跳馬同全能兩個項目攞到好成績，爭取巴西奧運入場券。