CY賀報業公會 再講3歲睇報紙

【明報專訊】以特首選舉為主題嘅港視劇《選戰》近日講到特首候選人同傳媒關係，現實中嘅特首梁振英（CY）噚晚則大談佢嘅閱報習慣，不過講緊嘅就係57年前嘅事。梁振英話，當年佢3歲，梁爸爸已經要求佢睇《工商日報》嘅專欄，包括「花鳥蟲魚」同「山川人物」等。咦？咁熟嘅？原來CY早喺2004年接受《文匯報》訪問，已經透露過呢個童年回憶，參選時亦成日講，所以聽到記者都耳熟能詳。


CY噚晚喺香港報業公會60周年酒會致辭，話自己過去50幾年來一直係香港報章長期同忠實讀者，20幾歲開始投稿，從事公職後仲同香港報紙形成「伙伴關係」，話同報業有無限親切感。佔領行動完結，佢話感謝警務人員外，亦要多謝傳媒嘅辛勤報道，令全社會能比較全面知道事態最新發展。CY強調政府重視、捍衛新聞自由，不過佢臨走前就無回應在場記者提問喇。