譚志源賀卿姐兩吃悶棍

【明報專訊】民主黨劉慧卿前晚成功連任民主黨主席一職，政制及內地事務局長譚志源噚日喺立法會政制事務委員會開會時，都好客氣咁恭喜卿姐當選主席，點知卿姐唔領情，反斥譚志源唔好喺度嘥時間。委員會主席譚耀宗都加一腳，話譚局長嘅恭賀說話同會議議程無關，搞到譚志源一鼻子灰，一臉尷尬。


封鎖留言 民主黨道歉

卿姐當選主席有局長道賀，不過一班網民就唔係咁睇，噚日唔少網民去民主黨facebook專頁「跟隊」留言話民主黨「無X用」，最終仲有留言被封鎖，搞到民主黨噚日要出埋道歉聲明。


前晚卿姐連任消息一出，即引起網上輿論好大迴響，咁啱民主黨喺專頁貼咗一張區諾軒落選後玩電腦嘅相，配以一句「選戰過後，即刻做番鍵盤戰士」，更為網上輿論火上加油，有網民大罵民主黨涼薄，仲有人話要版主停職。


區諾軒噚日就話，黨友都係同佢開玩笑，唔會放喺心，仲話今次雖然落敗，但希望大家更有準備喺出年區議會選舉報捷，仲話呢樣比佢選主席，更樂見其成。


乳鴿能否任要職 周四知道

Emily睇番前晚賽果，兩名副主席羅健熙、尹兆堅都以八成選票當選，而首兩名得票最高嘅中委，分別係佔中糾察柯耀林，同抗議中西區議會黑箱審批撥款嘅許智峯，兩人都算係較新嘅面孔。


民主黨將於星期四開會選出中央常務委員、秘書長同司庫，究竟成功入閘嘅乳鴿可唔可以身任要職，大家要留意喇。