最後一夜佔友不捨

【明報專訊】「It's just the beginning」表決心

佔鐘行動前晚，去到最後一夜，佔區人士百感交集，唔少人把握機會趕到金鐘緬懷一番。喺夏愨道開咗兩個幾月嘅自修室，變成燒烤場，一班學生以通宵燒烤迎接清場；亦有佔領者自發收集連儂牆嘅留言，以免普選心聲喺警員清場時被毁滅。人海中，除咗周圍都搵到象徵成場運動嘅黃色遮，前晚仲四處貼滿「We will be back」句子嘅標語，更有年輕人在凌晨近3點左近，喺佔區路口掛上一幅好搶眼嘅橫額，寫有「It's just the beginning」，表示清場唔代表運動結束，示威者嘅決心不死。


自修室變燒烤場

前晚嘅金鐘佔領區愈夜愈精彩，好多人放工放學後趕到嚟影相留念。有佔領者將自修室變成燒烤場，掛上「學生優先」嘅牌，帶埋物品即席燒烤。喺金鐘佔區，唔少人帶備飲品、零食喺馬路上野餐、唱歌，同佔領戰友道別，而現場有唔少人互相擁抱祝福，有市民流住眼淚，對夏愨村依依不捨。


擁抱流淚道別 影相留念

唔少人喺佔領區爬高爬低，搵地標位置影相留念，好似金鐘晚會大台、舉行記者會嘅命運自主台，都係拍攝熱點。有人用閃粉做道具，影相時灑喺地上，相片影出嚟效果係唔錯，但就有另一班佔領者批評閃粉飛到其他人身上，又話地下滿佈閃粉容易跣親人，雙方因為咁而嘈咗陣。


佔鐘最後一晚，現場無論係地下、掛喺電燈柱上嘅直幡都寫上「We will be back」嘅句子，堅持「爭取真普選」嘅信念，揚言「捲土重來」。有幾個年輕人仲整咗個寫住「It's just the beginning」嘅巨型橫額掛喺夏愨道路口，表示清場係運動嘅開始，並非完結。有人就去到連儂牆外嘅耕地，拎走菜苗返屋企種，話象徵普選由金鐘萌芽到遍地開花。