主角遇「點Jack」 港視廣告獲激讚

【明報專訊】香港電視開台3個星期，開台劇《警界線》都播得七七八八，話說噚日港視上載第15集，後段有一幕可能嚇親觀眾。話說戲中男主角周俊偉喺街上追住老婆蔣祖曼，點知老婆轉個彎變咗做麥當勞廣告入面個「點Jack」，仲同男主角一齊食麥樂雞，望真啲，哦，原來係廣告！Emily問過港視，呢個「點Jack」廣告原來係由港視製作，近日專登補拍嚟配合劇情，收費比一般廣告貴啲㗎！


港視話呢個絕對唔係植入式廣告，因為無為咗配合廣告商去改動情節、遷就布景，主要係廣告商、即係麥當勞，想畀觀眾多啲驚喜，所以先諗個方法，將宣傳內容融入劇情。咁的確係嘅，「點Jack」出現嗰吓可能有多少驚嚇，但廣告之後播番下一節劇集，消失嘅蔣祖曼出番嚟，延續原先劇情，其實無乜影響觀賞樂趣。


港視今次「另類植入」廣告仲獲得唔少網民激讚，覺得有驚喜、有創意，有網民話相比友台劇集安排女演員拎住支飲品狂錫、製作突兀「飲品牆」，港視高招得多。